It don’t mean a thing – if it ain’t got that swing
Sarah Vaughan – jazzdronning i forrige århundre – på besøk på Longva gjennom Sisi Sumbundu og Nordøyane Storband med gjestedirigent Eckhard Baur. Det måtte bli dagen for jazz!
Snikande haustmørke kunne ikkje skugge for tonar som trylla seg inn under snipp og hjarte. Kjærleik, vener og svingande rytmer! Dette var ei stund å ta med seg inn i vinteren.
Gjestar
Nordøyane Storband (NSB) er på sporet. Eckhard Baur har gjesta NSB fleire gonger (ca. sjette gongen no) og inspirert bandet og blitt inspirert av havluft og tare her ute ved havet der tonane godt kan fraktast vidare i havvinden. Baur er tilknytta universitetet i Oslo (Institutt for musikkvitenskap) og har ei mengde engasjement som dirigent. Er musikalsk leiar i Sandvika Storband. Og han trivest godt hos vener på øyane.
Sisi Sumbundu har ei allsidig karriere innan sang. Ho har deltatt i Stjernekamp, MGP, kora artistar som John Legend og Admiral P. Ho har gjeve ut eigen musikk, både album, EP og singel. No også innan Jazz saman med Eckhard Baur. For tida er ho med i ei oppsetning av ”Sister Act” i Oslo, som ho heldigvis fekk permisjon frå.
Første gangen for Sisi på Nordøyane, og ho er imponert over musikkmiljøet og naturen. Kult! Seier ho. Fekk reist litt rundtom i øylandskapet og fekk ei flott havoppleving ute ved Ulla Fyr.
Sarah Vaughan
Eit godt knippe låtar med tribute til Sarah Vaughan tok plass i ein kvar i Grendahuset denne søndags ettermiddagen. Vi som har lev ei stund, har i oss mellom anna ”Misty”, ”After you’ve gone”, ”It don’t mean a thing”, ”My funny Valentine” frå den tida då. Ein frisk pust til minnebanken. Gode aktørar både i Nordøyane Storband og gjestane som kunne glede ein fullsatt sal på Longva. Eit opplagt storband, inspirert av Sisi og Eckhard leverte gode soloinnsalg ved m.a. Sigvard Steen, Pål Forr Austnes og Arvid Steen.
Stemning
Musikken og stemninga gleda eit lydhøyrt publikum og applausen kunne fortelje at dette var mat for mons.Sisi Sumbundu, Eckhard Baur og Nordøyane Storband leverte over all forventning, skapte glede og god stemning. Det er slik det skal vere på konsert.
Avslutningslåten var ”It don’t mean a thing – if it ain’t got that swing”. Sisi inviterte til dans, men ingen torde. Likevel swinga det nok i mang ein dansefot rundt borda.
NSB
Nordøyane Storband har eit godt grep om storbandmusikken på Nordøyane. NSB har klart å halde topp nivå i mange år. Bandet har nytta mange gjestesolistar og gjeve øyfolket mang ei god oppleving innan både jazz og soul og musikkglede. Dirigent Arvid Steen var veldig godt fornøgd med konserten, storbandet og gjestane. Dei hadde hatt ei triveleg helg med musikk og venskap.
Eckhard Baur kjem nok igjen, for han har funne tonen med storbandet og miljøet. Kanskje kjem Sisi Sumbundu på nytt besøk, for ho trivdes med storbandet, naturen og kjempegodt kakebord.
Olav Skarstein